Kua ta e bon caminda?

Kua ta e miho manera pa biba?

Ta nesesario pa pensa riba e pregunta ei? Djis biba, nos ta wak kiko lo bin. Mi ke bai kèiru, bai studia, biba dushi, gana plaka òf portá sòru pa mi famia, mi yunan, òf, òf,.......

Niun hende no mester bisabu kon pa biba bo bida, bo mes ta tuma bo desishonnan. Pero si bo bida ta kana manera bo a plani’é, ta nifiká ku bo ta riba e bon kaminda?

E pregunta ta, si abo di bèrdát a haña loke bo tabata buska den bida. Portá bo a eksperensiá e otro banda di e asuntu akí kaba. Ora nos ta hoben, tur kos den bida ta mustra interesante, un reto, yen di kos nobo pa purba. Mayoria hende ta pensa ku un fiesta no ta bon, si alkohòl òf droga no kai den e wega. Loke nos no ta tende ta tur e hendenan ku a bebe asina dushi e anochi ei ku nunka mas no por a laga bibida para. Nan bida a kibra, nan matrimonio a kibra, problemanan na trabou, problemanan ku salú, finansieramente instabíl..... e pèrsona aki su fiesta a kaba sigur. Nan ta realisá nan mes ku nan no por disidí mas riba nan bida manera nan ke. Nan ta mará, nan no por dominá nan mes mas.

 

Tambe ta bin e peligernan di seksualidat liber

Si bo ke sintibu aseptá bo tin ku kuminsa trempán, pasobra sino bo no ta pèrtenesé den e grupo. Kiko tin di malu na dibertíshon den e bida kòrtiku aki? Wèl, diferente kos! Mas i mas hende ta muri di Aids i den e tempu di awor tin mas ku 37 diferente malesa di kaya. Banda di esaki e protekshon di un kòndòn ta hopi limitá. Bo tabata sa ku na momentu ku bo drumi ku un persona, bo ta drumi ku tur esnan ku tabatin promé ku bo den su bida tambe?

 

Kasi sigur abo nunka a pensa riba e kosnan ei, bo tabata djis pensa riba bo satísfakshon. Sea tardi òf trempán e resibu ta bin dilanti i e mester wòrdu pagá. E preis ta wòrdu pagá na diferente manera. Un hende muhé hoben ku mester kria su yunan su so, muchanan inosente  ku ta wòrdu ranká for di e bida akí ku aborto pa motibu ku esnan responsabel no ke para pa nan aktonan. Tambe tin e hende muhénan ku a hasi aborto, ku pa restu di nan bida ta wòrdu pèrsiguí pa sintimentu nan di kulpabilidat. Hopi hende a laga nan mes wòrdu guiá pa hasi abòrto pa medio di sirkunstansianan òf a tuma konseho serka otro hende. Mayoria ta realisá nan mes, ku nan a kita nan yu su bida ora ya no tin e posibildat pa bira bèk.

 

E Beibel

Beibel ta atvertínos bon kla pa e peligernan di un bida pa loko, e konsekuenshanan di  mal uso di alkohòl, uso di droga òf sèks pa loko. Dios no ta kontra pa bo pasa dushi den bida, pero E sa ku nunka lo bo no haña felisidat den e plasernan ku munda ta ofresebo. Tur ta plaser temporal, un sintimentu dushi temporal. Alfin al kabo bo ta ripará ku ainda bo ta sinti bo mes bashí, sin meta, inferior i solitario. Bo ta bolbe sali pa buska algu pa yena e bashí den bo paden.

 

Religion por duna nos e sentimentu ku tur kos ta bon. Nos ta kumpli ku kustumbernan religioso, i tuma parti na tur e ritualnan. Despues nos ta bai forma nos famia, kria nos yunan, pero esaki ta tur kos den bida? Esaki ta e bon kaminda? Kua ta e bon kaminda?

 

Un bida nobo!

Tin un kaminda di bèrdat! Tin un kaminda ku ta hiba na bida, i bida na abundansha! Hesus Kristu a bisa, ku E ta e úniko kaminda. Bo por buska kuantu ku bo ke, pero niun kaminda, den nada otro, bo no por haña loke ku E ta ofresebo. E ke un relashon, un amistat pèrsonal ku bo. No un bida laf, kaminda yen di kos ta prohibí, pero un bida kambiá for di paden.

Un bida nobo! Ku ta kuminsa ora e muraya di piká ku ta separábo for di Hesus wòrdu bashá abou. E muraya ku a wòrdu lantá ora bo tabata bibando den piká, segun bo propio ideanan, bo propio opinion òf opinion di komunidat. Bo ta basha e muraya ei abou, na momentu ku bo disidí di  pidi pordón i pone Hesus na promé lugá den bo bida.

 

No solamente ku palabra, pero tambe ku bo áktonan.

Den Beibel e desishon aki ta wòrdu yamá kombershon, un kambio kompletu kaminda Dios ta transformá bo bida ku Su forsa. No ta abo tin e forsa pa kambia bo bida, ta un milager kaminda Hesus ta bin biba den bo kurason. E ta dunabo un kurason nobo. Ku otro deséonan, ku outoridat pa domina bo mes. E ta e milager di Dios ku Hesus a yama, e nasementu di nobo.